Хос ишчи ўзига топширилган ишни қилишга имкон берилиши билан ишни адо қилиш муддатида ўзини топширган пайтдаёқ (хўп, ишни бажараман деган вақтда) иш ҳақини олишга ҳақли бўлади. Ишни бажардими, йўқми, бунинг фарқи йўқ. Чунки унинг иш ҳақини олишга ҳақли бўлиши ишга эмас, муддатга қараб бўлади. Шунинг учун ижара муддати давомида ёллаган одамдан бошқанинг ишини қилиши жоиз эмас. Энди агар бошқа одамнинг ишини ҳам қилиб берадиган бўлса ишлагани миқдорича иш ҳақидан камайтирилади. Муштарак ишчи эса қилган ишига қараб иш ҳақига ҳақли бўлади. Масалан тикувчи, дурадгор, бўёқчи, денгизчи ва бошқалар каби. Унинг иш ҳақини олишга ҳақли бўлиши муддатга қараб эмас, ишга қараб бўлади. Хос ишчининг ижара муддати битимда ё тайин қилинган ёки тайин қилинмаган бўлади. Агар тайин қилинмаган бўлса муддатни аниқ билмагани учун битим бузилади. Битим тузган икки тарафнинг ҳар бири хоҳлаган пайтида битимни бузиши мумкин. Бунда ёлланма ишчига хизмат қилган муддати учун ажри мисл бўлади. Агар муддат битимда тайин қилинган бўлса ва ишга ёллаган одам – ишчида иш лаёқатини йўқотиш ёки касаллик каби битимни бузишни тақозо қиладиган бирон узр ва айб бўлмаса ҳам – муддат охирига етмай туриб битимни бузадиган бўлса, бунда ишга ёллаган одам ишчига иш ҳақини муддат тугагунча бериши лозим. Ишчи хизматкор бўладими ёки деҳқонми ёки бошқами, фарқи йўқ. Аммо ижара битимини ишчида битимни бузишни тақозо қиладиган бирон узр ёки айб бўлгани учун бузадиган бўлса, бу ҳолда иш ҳақи бериши лозим эмас. Фақат битим бузилган вақтгача қилган меҳнати ҳақини беради.